17/07/2012.- AXENDA DE ACTIVIDADES   
O Concello de Allariz organiza a programación de verán 2012. Unha tradición que segundo explicaba o Alcalde, Francisco García, persegue varios obxectivos“ incidir na dinamización cultural, reforzar a capacidade de atracción turística de Allariz, ademais, da dinamización económica do municipio”

A programación de verán é multidisciplinar; inclúe actividades culturais e deportivas dende xullo a setembro.

No apartado cultural, destaca a parte etnográfica, as festas que recordan os traballos doutrora no ciclo do pan ou o Encontro de Cestería, que xunto coas Festas do San Bieito ou a Empanada ou a Festa da Patria Galega “contribúen a facer país e homenaxear á cultura galega” afirmaba Teresa Devesa, concelleira de Cultura.

As actividades deportivas que terán lugar durante a época estival céntrase no Triatlón Vila de Allariz, no que participan triatletas recoñecidos no eido deportivo; ou o Triatlón por equipos que nacía hai nove anos por iniciativa dos deportistas alaricanos, e que congrega a máis de cen participantes; ademais da regata de Piragüismo.

As Feiras do Doce, Melindre e Amendoado ou a de Artesanía, pechan o programa de verán, promocionando a repostería e artesanía de Allariz así como doutras localidades galegas ou do resto do Estado.