02/08/2012.- AXENDA DE ACTIVIDADES   
O fin de semana pasado deron comezo en Allariz as “Xornadas de Degustación de Carne de Boi”, unha iniciativa gastronómica coa que se pretende potenciar o medio rural e os atractivos locais.
Estas xornadas unen a potencialidade de Allariz en torno á gastronomía e a posibilidade de converter este municipio nun referente na comercialización de Carne de Boi.

Dende o  28 de xullo ata o 5 de agosto diferentes taperías de Allariz teñen a disposición dos clientes diferentes pinchos e tapas coa carne de Boi como protagonista.

O domingo 29 de xullo o Salón de Convencións do AC Hoteis acolleu ó Xantar Degustación de Carne de Boi. Cada comensal tivo a oportunidade de probar a exquisita carne de boi en máis de 10 formas diferentes de preparación: en empanada, carpacho, tártaro ou ensalada, ademáis de concentrado en caldo, albóndigas, hamburguesa, estofado, gulach ou o tradicional chuletón ou solombo.

A programación destas xornadas continúa durante toda a semana, o xoves 2 de agosto cun concurso gastronómico amateur de carne de boi e o venres 3 no entorno do Arnado celebrarase a primeira espetada de Boi, para 1000 comensais a 10 € por persoa.
O sábado 4 de agosto terán lugar as visitas a explotacións gandeiras. Visitaranse a Explotación de Vacuno de Penamá para coñecer un dos lugares onde se está a criar “Boi de Allariz”, a explotación de ovellas do Rexo e a queixería e por último á explotación de vacuno ecolóxico de Torneiros.