14/08/2012.- ACTUALIDADE MUNICIPAL   
A segunda campaña de escavacións na Atalaia do Castro de Armea, desenvolvida no mes de xullo polos arqueólogos David Pérez e Celso Barba, ven de deixar ó descuberto os restos dunha antiga calzada galaico-romana de 2,8 metros de ancho e 35 de longo. Trátase dunha rúa que data dos séculos III e IV, de trazado recto e ben pavimentado, que divide as diferente casas do poboado.

A zona escavada abarca unha superficie de 150 metros cadrados a continuación do territorio explorado o ano pasado onde se atoparon os primeiros muros duna vila galaico –romana.

Estes achados complementan a ruta turística xa sinalizada polo Concello de Allariz e que visitan, a diario, grupos de turistas e profesionais do gremio.

O vindeiro mes de setembro darán comezo as labores de restauración e consolidación dos muros co obxectivo de que non se deterioren co paso do inverto.

Francisco García, Alcalde de Allariz, mostrou o seu desexo de seguir apoiando os traballos de Armea e matizou que, nun futuro próximo, a intención municipal é establecer visitas guiadas.